Kanceri, shpresa për shërim

Kanceri, shpresa për shërim

Kërkimet shkencore për kancerin ka vite që kanë nxjerrë në dritë një të vërtetë: ka raste, edhe pse jo të shpeshta, që disa lloje tumoresh e kanceresh zhduken vetiu.

Për shembull, ka pasur raste kanceresh në veshka që thjesht janë zhbërë në organizëm, duke e nxjerrë këtë të fundit fitimtar.

Ndërkohë që neuroblastoma, një tumor shumë i rrallë që prek fëmijët e moshës së njomë, mund të kalojë pa pasur nevojën e medikamenteve. Megjithatë, bëhet fjalë për raste ende të rralla, pasi dihet mirë që kanceri është vdekjeprurës në më të shumtën e pacientëve. Duke qenë se çdo rast që diagnostikohet trajtohet menjëherë, duket si e pamundur që të pyesësh se çfarë do të ndodhte sikur sëmundja të lihej në mëshirë të fatit. Megjithatë, sado e çuditshme, një gjë e tillë ndodh.

Shkencëtarët thonë se kanë konstatuar një rast në Norvegji, që i ka bërë të mendohen gjatë në lidhje me kancerin e gjirit. Ky rast ndodhet në qendër të një studimi, në të cilin del në pah një fakt, që edhe kur kemi të bëjmë me kancere sulmues, pra shpërthyes, qëllon që gjithçka zhduket befas vetiu. Por ajo çka është me të vërtetë interesante, është fakti që raste të tilla shërimesh të befta dhe të plota po konstatohen gjithnjë e më shpesh. Për momentin nuk bëhet fjalë për ndonjë aplikim praktik, pasi askush nuk e di nëse një kancer ka nevojë për mjekim, apo do të zhduket vetë, vetëm se tashmë kjo e fundit është një mundësi që ekziston dhe njerëzit duhet të kenë më shumë shpresë.