RONALDO: NUK SHKOJ TEK REAL MADRID

Kristiano Ronaldo ka konfirmuar synimin e tij për të qëndruar te Mançester Junajtid. Spekullimet e fundit të shtypit spanjoll flasin për një kalim të portugezit te Reali i Madridit, në bazë të një parakontrate të firmosur prej kohësh.
Nga ana e tij, klubi i Realit nuk ka zyrtarizuar asgjë, teksa 24-vjeçari pohon se e ardhmja e tij është te “djajtë”, me të cilët ka fituar tri herë rradhazi Premier Ligën dhe të mërkurën do të luajë ndaj Barcelonës në finalen e Ligës së Kampioneve, me synimin për të mbrojtur “kurorën” e kampionit të Europës. 
Kristiano Ronaldo tha për “News of the World”: “Mançesteri është shtëpia ime dhe zemra i përket këtij ekipi. Dua të luaj në “Old Traford”.
Trajneri Ferguson beson te kjo skuadër dhe unë gjithashtu. Që kur kam ardhur në Angli ai ka qenë një baba i dytë për mua. 
Tani kjo është shtëpia ime. Unë mendoj se edhe kur them se zemra ime i përket Mançesterit, njerëzit do të vazhdojnë të flasin për një transferim timin.
Jemi pjesë e një epoke ku nuk mund t’i ndalim zërat, çfarëdo që të ndodhë. Unë kam një kontratë afatgjatë me Mançesterin dhe në fushën e lojës po fitojmë gjithçka të mundshme. 
As që më shkon ndërmend të largohem”. “Topi i Artë” ka vazhduar deklaratën e tij, duke falënderuar trajnerin Sër Aleks Ferguson. “Ai është sa dy njerëz njëkohësisht dhe të dy më kanë ndihmuar të arrij deri këtu. Si fillim ai ka mundësi të jetë trajneri më me shumë dije në botën e futbollit.
Mësoj prej tij çdo ditë, në çdo stërvitje. Pavarësisht nga niveli që arrij, pavarësisht se mund të përmirësohem shumë, unë e ndjej që Fergusoni ka ende diçka për të më mësuar. Nuk lodhem kurrë nga leksionet e tij, sepse e dij që çdo këshillë e zbatuar do të më bëjë një futbollist më të mire.